ការប្រឡងវាយតម្លៃបុគ្គលិកជំនាញដែលបានបញ្ជាក់ មានការប្រឡង 3 ប្រភេទគឺ “Nursing Care Skills Evaluation Test” “Nursing Care Japanese Language Evaluation Test” និងការប្រឡងវាស់កម្រិតសមត្ថភាពភាសាជប៉ុន។
ការប្រឡង “Nursing Care Skills Evaluation Test” និង “Nursing Care Japanese Language Evaluation Test” ត្រូវបានរៀបចំឡើងដើម្បីវាស់នូវកម្រិតនៃជំនាញមើលថែទាំ និងភាសាជប៉ុនដែលអាចយកទៅប្រើប្រាស់បាននៅក្នុងការងារមើលថែទាំជាក់ស្ដែង ដោយកំណត់នូវស្តង់ដារមួយ ដែលអ្នកប្រឡងជាប់មានលក្ខណៈសម្បត្តិអាចបម្រើការងារបានភ្លាមៗ។
កម្រិតសមត្ថភាពភាសាជប៉ុន ត្រូវបានវាស់តាមរយៈ “តេស្ដភាសាជប៉ុនកម្រិតមូលដ្ឋានរបស់មូលនិធិជប៉ុន (JFT-Basic)” ឬ “ការប្រឡងជំនាញភាសាជប៉ុន (JLPT) (កម្រិតចាប់ពី N4ឡើង)”។

 ទោះជាមិនធ្លាប់ស្នាក់នៅប្រទេសជប៉ុនពីមុនក៏ដោយ គេអាចចូលទៅប្រទេសជប៉ុនតាមរយៈលក្ខណៈសម្បត្តិស្នាក់នៅ “ស្នាក់នៅរយៈពេលខ្លី” ក្នុងគោលបំណងទៅប្រឡងបាន។
ម្យ៉ាងទៀត គេអាចប្រឡងនៅបរទេសក៏បាន។ គិតត្រឹមខែមីនា ឆ្នាំ2021 មានការរៀបចំអោយប្រឡងនៅប្រទេស កម្ពុជា ឥណ្ឌូនេស៊ី ម៉ុងហ្គោល ភូមា នេប៉ាល់ ហ្វីលីពីន ថៃ។

បេក្ខជនអ្នកជំនាញមើលថែទាំដែលបានចូលមកប្រទេសជប៉ុនតាមរយៈប្រព័ន្ធ EPA ដែលបានធ្វើការ ឬធ្វើកម្មសិក្សានៅមណ្ឌលមើលថែទាំជាដើម ដោយត្រឹមត្រូវអស់រយៈពេល 4ឆ្នាំ និងជនបរទេសដែលបានបញ្ចប់ “កម្មសិក្សាជំនាញកម្រិត(ii)” ផ្នែកមើលថែទាំ ត្រូវបានគេវិនិច្ឆ័យថាមានកម្រិតជំនាញ និងកម្រិតសមត្ថភាពភាសាជប៉ុនគ្រប់គ្រាន់ ត្រូវបានលើកលែងការប្រឡង ហើយអាចបន្តទៅយក “បុគ្គលិកជំនាញដែលបានបញ្ជាក់ (i)” បាន។ ប៉ុន្តែ ចំពោះជនបរទេសដែលបានបញ្ចប់ “កម្មសិក្សាជំនាញកម្រិត(ii)” ក្នុងជំនាញផ្សេងក្រៅពីការមើលថែទាំ ការប្រឡងវាស់សមត្ថភាពភាសាជប៉ុនមួយផ្នែកត្រូវបានលើកលែង។ (ចាំបាច់ត្រូវធ្វើការប្រឡង “Nursing Care Skills Evaluation Test” និង “Nursing Care Japanese Language Evaluation Test”។)

គ្មានកម្មវិធីអាហារូបករណ៍ផ្ដល់ដោយរដ្ឋាភិបាលជប៉ុនសម្រាប់ថ្លៃអប់រំក្រោយពេលចាប់ផ្ដើមធ្វើការងារក្រោមបុគ្គលិកជំនាញដែលបានបញ្ជាក់ ប៉ុន្តែមានការផ្ដល់ជំនួយលើការបណ្ដុះបណ្ដាល។ល។
ម្យ៉ាងទៀត នៅតាមខេត្ត និងមណ្ឌលថែទាំនីមួយៗ មានកន្លែងខ្លះមានកម្មវិធីផ្ដល់ការអប់រំ និងការ​ជំនួយផងដែរ។